skip to main |
skip to sidebar
話說上個flight飛左去Perth，返香港個程見到一大鵬人上機，重係個個都姓Osmond！咦奇妙喎！我做左咁多年，都未曾見過咁大個家族一齊travel喎！等我調查吓先！
架機起飛後，有位Osmond叔叔攞住一大堆海報派街坊，又問我地班crew有冇人識佢地隊兄弟組合？70年代紅極一時個喎。阿叔叔，我地d BC好細架咋，個個都係80年代出世，就算70年代個d，當年仲食緊奶咀邊度識聽英文歌呀！至於 ISM 呀、SP呀，呢班就算識都唔肯認啦，咪暴露晒我地D真實年齡？無解嘅！
唉，不過見佢咁鬼熱情，真係唔忍心掃阿叔慶，唯有話:
「哦！奧士文兄妹合唱團吖嗎？好出名個喎 七十年代！我阿爸同阿媽都好鐘意聽你地唱歌架！(實情佢地最鍾意聽潮州曲)」
「係咩？我地係張海報度簽名，送俾佢地做記念啦！」
「好呀！吖吔多謝哂喎，佢地一定好開心！」
原來The Osmonds今年慶祝50周年，作世界巡迴演唱，今次路經香港去台北。
當年佢地唱個隻爛萍果"One Bad Apple"原來試過連續5次上Billboard 冠軍流行榜架！
返到屋企，問老婆記唔記得奧士文，佢扮唔識。
問阿媽，佢話乜野嚟架？
黑暗中聽到有人大叫，猛話開唔到門，緊係度廁所門壞咗，於是我又要做埋機艙維修，大力推開，點知成度門閂luck埋，見到係入面被困既大叔，用D我聽唔明既地道方言再大叫，唉度門壞咗唔關我事呀，救你出嚟多謝都無句。
飛咗十幾年，係飛機度乜野人都見過。印象最深刻係高大威猛既周潤發，一D架子都冇，又有禮貌，唔該前唔該後；佢老婆亦斯文大方，全程為發哥打點一切。
而唱歌勁好聽既張學友，有次帶埋老婆同兩個女去日本，雖然細女成日喊，佢冇唔耐煩，猛係度引個女玩，表現出佢既父一面。而張太，帶住頂cap帽，連對眼都幾乎遮曬。
蔡少芬小姐，真人好高，皮膚好靚，有教養，成日都唔該我。仲有，佢大部份時間係度睇聖經，真係好虔誠。
任達華同琪琪兩公婆就表現得好恩愛，温馨塲面不時會出現。
仲有好多大小明星、CEO、政要....飛機常客。
其實，公司既大老板都係高大靚佬一名，似高版Richard Gere。
好啦，講住咁多先，又要飛啦！
空中老爺最怕:
1)杯麵味道，聞到就想嘔。
2)失驚無神嘅氣流，迫自己脚踏實地。
3)Mumbai flight，成個機艙D咖哩味。
4)飛北京上海唔記得帶回鄉咭。
5)roster七日stand-by，乜都做唔到剩係坐係屋企等電話。
6)係bund度瞓瞓吓覺聽到有人發開口夢、磨牙。
7)個「波羅」客想食魚無唒魚、想食牛扒無唒牛扒，佢重話要向公司反眏。
8)食緊飯call bell閃唔停。
9)約翰尼斯堡渡假式bungalow，間房D蛇蟲鼠蟻好得人驚。
一時間不能盡錄，講住D先。
呢度係我大部份時間工作既地方 -
頭等機艙 (有時候亦會係Business class)
Full load既話就會有9位乘客
首先要記住佢地姓乜 (唔通叫人 呀喂 咩)
令佢地有賓至如歸既感覺
一上機
緊係問 要飲D乜野呢
起飛後通常就開餐
其實乘客鍾意幾時食呀飲呀都得架
俾成幾萬蚊有乜唔得吖(HK-Paris return 1st-class $79,000)
餐牌好豐富架
有魚子醬三文魚Krug香檳Lynch Bages/ Tignanello紅酒
各式主菜芝士生果甜點咖啡digestifs
Long-haul flight既話食完野通常都會瞓覺
我地會幫佢地鋪好張床 (flat bed: 81"長)
遞上pyjama(上海灘) + overnight kits
祝君晚安！
真係幾嘆架
我都係坐過兩次咋....
